पणजी : गोव्याची राजधानी पणजी महानगरपालिकेसह ग्रामपंचायत निवडणुकीची मतमोजणी आज सोमवारी (दि. २२) झाली. गोव्याचे मुख्यमंत्री डॉ प्रमोद सावंत ...
पणजी :
गोव्याची राजधानी पणजी महानगरपालिकेसह ग्रामपंचायत निवडणुकीची मतमोजणी आज सोमवारी (दि. २२) झाली. गोव्याचे मुख्यमंत्री डॉ प्रमोद सावंत यांच्यासाठी प्रतिष्ठेची बनलेल्या साखळी पालिकेच्या पोटनिवडणुकीत मोठा धक्का बसला आहे. काँग्रेसने साखळी पोटनिवडणुकीत बाजी मारून भाजपला धक्का दिला आहे.
साखळी पालिकेतील प्रभाग क्र. ९ मध्ये झालेल्या पोटनिवडणुकीत भाजप विरोधात काँग्रेस अशी लढत होती. पक्षीय पातळीवर निवडणूक झाली नसली तरी दोनच उमेदवार या रिंगणात असल्याने या निवडणुकीला भाजप विरुद्ध काँग्रेस असे लढतीचे स्वरूप आले होते.
भाजपकडून दशरथ आजगावकर निवडणूक रिंगणात होते. त्यांच्यासमोर कॉंग्रेसने रमेश आमशेखर यांना उमेदवारी दिली होती. धर्मेश सगलानी आणि प्रवीण ब्लेगन यांच्या नेतृत्वाखाली आमशेखर रिंगणात होते. भाजपाकडे ५ आणि कॉंग्रेसकडे ५ असे संख्याबळ असल्याने या पोटनिवडणुकीवर सत्तेची समीकरणे अवलंबून होते. त्यामुळे भाजपाने ही निवडणूक प्रतिष्ठेसाठी केली होती.
मुख्यमंत्री सावंत यांच्याकडेच या निवडणुकीच्या प्रचाराची सर्व सूत्रे एकवटलेली होती. काँग्रेसने ही जागा आपल्याकडे खेचत डॉ. सावंत यांना आणि भाजपला मोठा धक्का दिला आहे. या विजयाने साखळी पालिकेवर काँग्रेसचा झेंडा लागला असून ही भाजपसाठी आत्मचिंतनाची बाब बनली आहे.
भाजपने केवळ ही पोटनिवडणूक गमावली नाही तर पालिकाही त्यांच्या ‘हातून’ निसटली आहे.
COMMENTS